விஸ்வரூபம் என் மனதில்............

விஸ்வரூபம் திரைப்படம் ஆரம்பிக்கபட்ட காலத்திலிருந்தே படம் பற்றிய செய்திகளுக்கும், சர்ச்சைகளுக்கும் பஞ்சமில்லை. இவற்றை எல்லாம் பற்றி பேச முன் ஒரு விடயம் சொல்ல வேண்டும். நான் ஒன்றும் கமல் ரசிகனும் இல்லை, முஸ்லீம் நண்பர்களுக்கு எதிரானவனும் இல்லை. சாதாரண வாழ்க்கையில், அசாதாரண விடயங்களை கொஞ்சம் அக்கறையுடன் பார்ப்பவன் என்ற ரீதியிலான எனது கண்ணோட்டமே இது!

விஸ்வரூபம் என்பது முதலில் திரைப்படம் என்ற ஒன்று மட்டும்தான் என்று, எதிர்பாளர்களுக்கு பலவிதத்தில் புரியவைத்து திரைப்படத்தை வெளியிடுவதற்கான திகதியாக, ஜனவரி 25ம் திகதியை அறிவித்திருந்த போதும், சில இந்திய இஸ்லாமிய அமைப்புக்கள் அந்த படத்தை தடைசெய்ய கோரி, மிக மிக அவசரமாக குறுகிய காலஇடைவெளிக்குள் சிறப்பாக செயல்பட்டு இருந்தன. அதை பார்த்து, இலங்கையிலும், வான்கோழி போன்று, இலங்கை இஸ்லாமிய அமைப்பும் திரைப்படத்தை திரையிட தடை செய்யுமாறு கோரிக்கை விடுத்திருந்தது.

இந்தியாவை பொருத்தவரை, இந்து-இஸ்லாமிய பிரச்னை மிக தீவிரமானது, பயங்கரவாதமும் – மதமும் இணைத்து பலசந்தர்ப்பங்களில் பார்க்கபட்டே வந்திருக்கிறது. அந்தவகையில், அவர்களின் எதிர்ப்பு என்பது அமைந்திருக்கிறது. அதில், நிறையவே, அரசியல் முலாம் பூசபட்டு..... இலங்கையிலிருக்கும் எங்களுக்கு அப்படி என்ன வந்தது? திரைப்படத்தை தடைசெய்வதற்கு என்றுதான் விளங்கவில்லை.

இலங்கையில் உள்ள இஸ்லாமிய மதஅமைப்புக்களை சேர்ந்தவர்கள் என்னும் விஸ்வரூபம் திரைப்படத்தை பார்க்கவும் இல்லை. பின்பு, எதன் அடிப்படையில், திரைப்படத்துக்கு எதிர்ப்பை வெளியிடுகிறார்கள்? என்றுதான் புரியவில்லை. இந்தியாவில் பார்த்தவர்கள் எதிர்கிறார்கள் என்ற அடிப்படையில், திரைப்படத்தை இஸ்லாமிய மத அமைப்புகள் இந்தபடத்தை தடைசெய்ய விரும்பினால், அவர்களுக்கு இஸ்லாமிய பிரதமரை கொண்டிருக்கும் மலேசியா என்கிற நாடு கண்ணுக்கு புலப்படவில்லையா? அங்கு, திரைப்படம் தணிக்கை குழுவால், எந்தவகையிலும் காட்சிகள் நீக்கபடாமல், வெளியிடபட்டிருக்கிறதே? இதற்க்கு என்ன பதில் சொல்ல போகிறீர்கள்?

சினிமாக்கள் என்னமும் இலங்கையில், வெறுமனே சினிமாக்களாகவே இருக்கிறது. அது சமூகத்தின் உடையில், பழக்கவழக்கத்தில், சிகையலங்காரத்தில் மட்டுமே மாற்றங்களை ஏற்படுத்தி இருக்கிறதே தவிர, உங்கள் உங்கள் வரலாறுகளிலும், தொன்மையான உணர்வுகளிலும் அல்ல என்பதை புரிந்துகொள்ளுங்கள். கமல் என்கிற சாதாரண கலைத்துறையாளனால், வெறுமனே மூன்று மணிநேரத்தில் எல்லோர் மனங்களையும் மாற்றி, முட்டாளாக்கி விடமுடியாது அல்லது நம்பிக்கைகள் மீது அதிர்வலைகளை உண்டுபண்ணி விட முடியாது என்பதை புரிந்துகொள்ளுங்கள் நண்பர்களே!

உண்மையான காரணங்களுக்காக நாங்கள் போராட தயாரில்லை. எங்களுடைய உரிமைகளும், உங்களுடைய வரலாற்று சின்னங்களும் அழிக்கப்படும் போதும், வெறுமனே கைகட்டி, வாய்பொத்தி நிற்கிறோம். ஆனால், எங்கோவிருந்து வணிகம் செய்ய விரும்பும் ஒருவனுக்கு இலவச விளம்பரம் செய்ய தயார் ஆகிவிட்டோம் அல்லவா? உண்மையை சொல்லுங்கள், படத்தை தடைசெய்ய வேண்டும் என்ற முடிவுக்கு வந்த பின்னர், உங்களில் எத்தனை பேர் இந்த படத்தை DVDகளில் பார்க்க தயாராக இருக்கிறீர்கள்? உங்களில் எத்தனை பேர் தடையுத்தரவு விலகிய பின்னர், பார்க்க தயாராக இருப்பீர்கள்? உங்களில் எத்தனை பேர் VIP SHOWவுக்கு தயாராக இருக்கிறீர்கள்? பிறகு, எதற்கு தடை என்று உங்களையும் நீங்கள் விளம்பரபடுத்தி கொண்டு, விஸ்வரூபம் திரைப்படத்துக்கும் இலவச விளம்பரம் தருகிறீர்கள்?

இந்த விடயத்தில் கமல் என்கிற நடிகனை, நான் ஆதரிக்கிறேன்! மிக சிறந்த நடிகன் என்பதை தாண்டி, மிக சிறந்த வணிகவியலாளன் என்கிற நிலையை அவர் பெற்று இருக்கிறார் என்று சொல்லலாம். விஸ்வரூபம் படத்தில் அப்படி என்ன _ _ _ தான் இருக்கிறது என்று ஒவ்வருவரையும் திரயரங்குக்கே வரவைக்க கூடிய வகையிலான, உச்சமான விளம்பரத்தை பெற்று இருக்கிறார் என்று சொல்லாம். இதை கமல் எதிர்பார்த்ததுதான். ஆனால், திரைப்படம் அளவுக்கு, விளம்பரமும் விஸ்வரூபமாக இருக்கும் என்று எதிர்பார்த்து இருக்கமாட்டார். உண்மையில் அவரது விஸ்வரூபம் திரைப்படத்தின் “இவன் யாரென்று புரிகிறதா?” பாடல் வரிகளுக்கு அவர் மட்டுமே சொந்தகாரனாக இருக்க முடியும். J

நிச்சயமாக, திரைப்படம் திரையிடபட வேண்டும். அப்போது, நீங்கள் சொல்வது போன்று, அவமதிப்பை அல்லது எதிர்மறை கருத்துக்களை கமல் தன்னுடைய படத்தில் கொண்டிருந்தால், அவரை நீதிமன்றத்துக்கே அழையுங்கள் தவறில்லை. ஆனால், உங்கள் நலனுக்காக எதையும் செய்துவிடலாம் என்று இதையும் செய்து விடாதீர்கள். நிறைய விடயங்களை ஆழமாக பேசலாம். அவை, எம்மை வேறு எங்கோ அழைத்து போய்விடும்.

இறுதியாக, இது எப்படி?

பல்லு இருக்கிறவன் பகோடா சாப்பிடுறான். பணம் இருக்கிறவன் பிளைட் பிடிச்சு போய் படம் பாக்கிறான். J